16.10.20.- En dous días temos casi triplicado o número de casos de enfermos pola Covid-19 no noso concello. O martes informabamos de 5 casos repartidos en dúas unidades familiares e hoxe temos que falar de 14 casos en tres unidades familiares. É dicir, nunha das familias aumentou a cantidade de persoas infectadas e ademais apareceu unha nova unidade familiar de 5 persoas enferma. Todos eles están xa confinados e con control médico.
18.06.20.- Estes meses de verán serán un pouco diferentes para os máis pequenos da casa en Vilamartín xa que este ano non é posible poñer en marcha as actividades do campamento Vilaverán. As condicións xeradas a partir da COVID-19 levaron á Concellería de Cultura a ter que cancelar estas actividades. Tal e como explica a concelleira, Claudia Núñez, “despois de moito deliberar tomamos a decisión de cancelalo xa que non podemos cumprir coas medidas de seguridade que se esixen”.
A primeira semana deste mes de marzo dedicarémola a varias actividades para celebrar o 8 de Marzo, o Día da Muller Traballadora. Todas elas farémolas en colaboración coa Plataforma Mulleres de Valdeorras. Empezaremos o mércores día 4 cunha conferencia debate sobre a "A Igualdade da Muller no Século XXI" no Centro Santa Lucía ás 18 horas. O venres, día 6, ás 12 horas faremos diante do concello a lectura do Manifesto 8M e durante a fin de semana haberá cine no Santa Lucía o sábado coa proxección da película "Casa de Bonecas" e o domingo marcharemos de romería ata San Miguel de Outeiro.
02.12.19.- Estreamos mes de decembro e un ano máis xa están preparadas as actividades do Campamento urbano do Vilanadal. O Concello abre o prazo de inscrición para que este ano uns 45 nenos poidan gozar de varias actividades que se celebrarán no pavillón municipal. Os obradoiros, inchables e outras sopresas estarán listas para empezar o día 23 de decembro e rematarán o día 3 de xaneiro. Hai posibilidade de apuntarse por días soltos, para unha semana ou para todo o Nadal.
19.11.19.-A Concellería de Servizos Sociais do Concello levará a cabo as seguintes actividades para conmemorar o 25 de Novembro, Día contra a Violencia de Xénero.
MAI MAI: 25 de Novembro, 6 da tarde no Centro Sociocultural Sta. Lucía de Vilamartín,
Obra de teatro representada por BAOBAB TEATRO, compañía de teatro infantil de gran recoñecemento e premios a sua traxectoría.
10.07.19.- Un ano máis comezaron as actividades de Vilaverán no mes de xullo. Nesta primeira quincena están participando nas actividades un total de 18 nenos/as de entre 4 a 12 anos. Están atendidos por 2 monitores e 3 voluntarios que durante toda a semana organizan actividades diferentes adaptadas ás idades dos participantes.
Para a segunda quincena e tamén para o mes de agosto aínda poden inscribirse rapaces. Poden inscribirse por semanas e quincenas achegándose ao casa consistorial e formalizando a inscrición.
08.01.19.- Unha vez rematadas as festas queremos facer repaso as actividades do Vilanadal a través dalgunhas fotos. Agardamos que todos os nenos o pasaran moi ben e queiran repetir.
02.11.18.- A actividade de fútbol sala que imparte o concello de xeito gratuíto para os nenos comezou no mes de outubro cunha pequena axuda de Deputación. Dende a Concellería de Deportes informan da concesión dunha axuda económica por valor de 646.22 euros para sufragar unha pequena parte desta actividade para todo o ano. Dita contía, explican que é a única que en Deportes se recibe dende a Deputación de Ourense de xeito anual.
21.09.18.- A Concellería de Deportes xa ten lista a programación deportiva ata final de ano para os máis pequenos da casa. O fútbol sala e as actividades de multideporte faranse os mércores e venres no Pavillón Municipal de Deportes no Bañadoiro. Establecen un mínimo de 8 número de asistentes para levar a cabo estas actividades e falta de asistencia pode levar a suspensión da mesma. O próximo 3 de Outubro será o momento de empezar estas actividades.
Galego
Español
