12.03.20.- A Concellería de Cultura quere agradecer a implicación de dúas persoas para que finalmente o pobo poida celebrar as festas do San Xurxo no mes de abril. A concelleira, Claudia Núñez, amosa a súa satisfacción por poder contar con Javier Ferrer e Victor Ramos para poder montar a comisión de festas e organizar un programa de actividades para os días de festexos do 23 ao 26 do mes que ven. De momento aínda non se coñece a programación pero iremos informando a medida que coñezamos máis detalles.
Na sesión plenaria celebrada o día 30 de xaneiro aprobouse unha moción presentada polo grupo municipal socialista solicitando unha solución para o acceso ao pobo de San Vicente.
20.11.19.- Dende hai varios meses a pechadura do Centro Social de San Vicente ven sufrindo varios danos que inhabilitan o uso do local e xeran gastos para o concello e os veciños. O Concelleiro de Benestar e Participación Cidadá, José Luis Álvarez, amósase preocupado e indignado pola mala fe coa que actúa o saboteador ou saboteadores. Dende fai unha semana hai colocados carteis polo pobo e no centro social no que se solicita a persoa ou persoas que fan os danos que deixen de facelo.
10.10.19.- A Deputación de Ourense comunica nun escrito que as obras do novo acceso ao pobo de San Vicente non poderán empezar antes do primeiro trimestre do ano 2021. A explicación está na serie de trámites que están en marcha dende este ano e que non rematarán antes desa data. Entre eles están as expropiacións, notificacións, recursos e redacción de proxecto. Toda esta información foi aportada dende o organismo provincial ao grupo provincial socialista que pediu información sobre o estado das expropiacións para a construción do acceso a San Vicente.
25.04.19. As festas do San Xurxo son unha das datas do ano para reunir aos veciños e pasar un bo momento con música, actividades deportivas e teatrais. Un ano máis os días de festa estiveron cheas de risas e bos momentos. Con estas fotos lembramos o San Xurxo 2019.
14.09.18.- Obras en dous pobos do concello, San Vicente e Córgomo, así como o arranxo dun vial de comunicación foron os destinatarios dos fondos do remanente de tesoureira. Uns fondos propios que tamén deron para os arranxos das instalacións da piscina, como xa se relatou noutra información desta web municipal. Na Praza do Fondo do Enxortedo e no muro de contención da igrexa en San Vicente investíronse 15.500 euros.
18.04.18.- O Concello de Vilamartín homenaxeará ao seu patrón con 4 días de festa que está a organizar unha comisión de festas. As actividades festeiras empezarán mañá venres coa actuación do grupo La Banda de Mazinger. No resto dos días actuarán as orquestras Grafitti, Fania Blanco Show e Marbella. As actividades complétanse o sábado con fútbol sala, e inchables e unha obra de teatro que será o domingo por un cambio de última hora, xa que estaba no programa previsto para o sábado.
15.03.18.- Esta mañá celebrouse unha reunión en Ourense co presidente da Deputación de Ourense, onde se lograba un “compromiso por escrito” para mellorar a situación da estrada a San Vicente de Leira. Entre os acordos están a retirada da valla fixa e a colocación dunha móbil para o paso de vehículos de emerxencias. Ademais arranxarase a pista municipal para contar cun acceso ao pobo alternativo. Ante estes acordos o rexedor comunicou que a paralización das mobilizacións deixaríaa nas mans dos veciños.
06.03.18.- A estrada pertencente á Deputación de Ourense leva sufrido nos últimos días graves derrubes que acentúan o estado de ruína no que xa se atopaba. O rexedor leva sete anos tentando buscar unha solución co organismo provincial a un vial que leva case 25 anos de problemas polo mal estado. Ante a falta de actuacións e dado que o problema se agravou nos últimos días, esta tarde convocouse unha rolda de prensa no pobo de San Vicente no que se anunciaron medidas de presión.
18.04.17.- Este fin de semana a vila vivirá a festa do seu patrón, San Xurxo, e entre as actividades previstas, celebraráse un torneo de fútbol sala para os cativos. A Concellería de Ocio e Deporte, con Eva Arias ao frente, está organizando este torneo que comezará o sábado, día 22, ás 9:30 horas e ata as 14 horas. O evento deportivo celebraráse no pavillón do Bañadoiro e todos os rapaces participantes recibirán unha medalla, un obsequio e tamén unha chocolatada con churros a media mañá.
Galego
Español
