25.08.16.-A segunda edición Travesía a Nado de Valdeorras celebrouse o pasado día 20 nas augas do río Sil entre O Barco e Vilamartín. Dúas das tres probas tiveron lugar en territorio de Vilamartín, na área recreativa do Bañadoiro, e reuniron a centos de persoas entre nadadores, acompañantes e público. 90 participantes tomaron a saída para completar os 2.525 metros do recorrido curto e os 5.050 metros do longo, puntuables para o XIII Circuíto Galego de Augas Abertas. Esta segunda Travesía a Nado de Valdeorras estivo organizada polo A.D.A.S Swimming do Barco e colaboraron a Concellería de Deportes do Concello de Vilamartín, O Club Fluvial Barco e Protección Civil de Vilamartín, O Barco e Petín.
A celebración desta proba contou tamén coa colaboración doutras entidades como a Asociación de Coveiros de Vilamartín que ofreceu unha pancetada e viño ao remate da proba. Outros colaboradores activos foron a Asociación Penas D´auga que aportaron unha alfombra de céspede artificial para a entrada e saída dos competidores. Tamén estiveron de patrocinadores: Ayasa Construcións, GMA Sport Nutrition, Iberdrola, Pazo do Castro, O Consello Regulador de Deportes, Ambulancias Sil entre moitos outros. A todos eles dende a Concellería de Deportes agradecese o traballo e colaboración para facer posible esta proba.
Os resultados das probas
Tanto a proba de 2250 metros como a de 5050 metros podían facerse con ou sen neopreno. Gaspar Andrade Budiño (C.N. Arzúa), foi o primeiro en recorrer os 5.050 metros da proba longa sen neopreno. En segundo e terceiro lugar chegaron Lucas Costa Fernández (C.N. Ponteareas) e Martín Carrera Costas (C.N. Ponteareas). As mulleres que chegaron nos tres primeiros postos nesta proba foron: Carla Goyanes García, de Vigo, Laura Rodríguez Novoa (C.N. Ponteareas) e Ana Veiga Souto (C. De Mar San Amaro), da Coruña. Paquito Fernández e Iván Raña foron os primeiros nesta distancia con neopreno.
Na proba curta, David Crespo González foi o primeiro en chegar, no segundo posto Sergio Picallo (C.N. Coruña), e Marcos Martínez (C.N. Ponteareas), terceiro. Na categoría feminina Laura Costa Fernández (C.N. Ponteareas) foi a primeira en chegar á meta, María Ferreira González (C.N. Master Mos), segunda e Cristina Claviño (C.N. Ponteareas), terceira.
Entre os participantes de clubes locais os primeiros en chegar na proba longa foron: Eva Goicoechea do A.D.A.S Natación, Francisco Camba Rodríguez do Club Peña Trevinca Barco e Milagros Morena Aller tamén do Club Peña Trevinca. Con neopreno, os primeiros na distancia de 2525 foron Manuel Monroy, Javier Martín e Alejandro Pérez.